اسلام آباد۔23مئی (اے پی پی):وزیراعظم شہبازشریف گردے اتے جگر دے ہسپتال پاکستان کڈنی اینڈ لیور انسٹیٹوٹ(پی کے ایل آئی) لاہور دے بورڈ بحالی دا باضابطہ حکم جاری کرݙتے۔ وزیراعظم آفس دے میڈیا ونگ توں جاری بیان موجب ڈاکٹر سعید اخترکوں امریکہ توں واپس سݙ تے ول پی کے ایل آئی دا چئیرمین مقرر کرݙتا ڳئے، وزیراعظم شہبازشریف گزریل ݙینھ پی کے ایل آئی دے بورڈ آف گورنرز دے اجلاس دی صدارت کیتی ہئی ۔ چار سال پہلے ڈاکٹر سعید اختر عدالتی کارروائی اتے ٻئے مسئلیں دے بعد امریکہ واپس ٹر ڳئے ہن ۔ ڈاکٹر سعید اختر شہبازشریف دے جذبہ ݙیواوݨ تے امریکہ توں سارا کجھ چھوڑ تے پاکستان آئے ہن۔ وزیراعظم شہبازشریف ڈاکٹر سعید اختر کوں واپس گھن آوݨ اچ ذاتی طور تے کردار ادا کیتا ۔ پی کے ایل آئی گردے اتے جگر دی پیوند کار ی دا جدید ترین تے عالمی معیار دا حامل اولین ادارہ اے ۔ یاد رہے جو وزیراعظم شہبازشریف بطور وزیراعلی اے منصوبہ جگر اتے گردے دے مریضاں کوں ٻاہرلے ملک علاج دے مہانگے خرچے تے سفری اوکھ توں بچاوݨ کیتے بݨایا ہئی ۔ عمران خان حکومت اچ ایں منصوبے کوں وی سیاسی انتقام دا نشانہ بݨایا ڳیا۔
