اسلام آباد۔6ستمبر (اے پی پی) وزیراعظم محمد شہبازشریف آکھیا جو قوم شہیداں کوں سلام پیش کریندی اے، بدترین چھل دے چیلنج دا قومی اتحاد اتے یکجہتی نال مقابلہ کریسوں۔ منگل کوں وفاقی کابینہ دے اجلاس توں خطاب کریندیں ہوئیں وزیراعظم آکھیا جو اڄ قوم یوم دفاع ہک ویجھے ویلھے منیندی پئی اے جݙاں ملک کوں بدترین سیلاب دا سامݨا اے۔ ملک اچ شہیداں دی قبراں تے پھلاں دی چادراں چڑھائی ویندی پئن، انہاں کیتے دعائیں کیتی ویندی پئن اتے انہاں کوں خراج عقیدت پیش کیتا ویندا پئے۔ پوری قوم آپݨے شہیداں اتے غازیاں کوں سلام پیش کریندی اے جنہاں اڄ توں 57 سال پہلے پاکستان تے رات دے اندھارے دشمن دے بزدلانہ حملے تے لاالہ الااللہ دا ورد کریندیں ہوئیں دشمن دا دیوانہ وار مقابلہ کیتا اتے آپݨے خون نال پاکستان دی سرحداں دی حفاظت کیتی۔ انہاں آکھیا جو نہ صرف پوری پاکستانی قوم بلکہ اساݙی آندی نسلاں اتے اساݙے ٻال انہاں شہیداں اتے غازیاں کوں ہمیشہ یاد رکھیسن۔ وزیراعظم مادروطن کیتے دفاع کیتے قربانیاں ݙیوݨ آلے شہیداں اتے غازیاں کوں خراج عقیدت پیش کیتا اتے آکھیا جو پوری قوم انہاں کوں سلام پیش کریندی اے جنہاں آپݨی جاناں دے نذرانے پیش کیتے اتے چار گنا وݙے دشمن کوں ہرایا۔ انہاں دی اے قربانی ضائع کائنا ویسی۔
.jpg)
