اسلام آباد۔10اکتوبر (اے پی پی) وفاقی وزیر داخلہ محسن نقوی شنگھائی تعاون تنظیم(ایس سی او )سربراہی کانفرنس دی تیاریاں دا جائزہ ڳھنݨ کیتے اسلام آباد شہر دا دورہ کیتا۔ انہاں ڈی چوک، شاہراہِ دستور، مری روڈ اتے اسلام آباد ایکسپریس وے دا تفصیلی معائنہ کیتا۔ وزیر داخلہ محسن نقوی ایس سی او سربراہی کانفرنس کیتے تزئین و آرائش اتے صفائی دے انتظامات دا وی جائزہ ڳھدا۔ وزیر داخلہ محسن نقوی ایس سی او سربراہی کانفرنس کیتے بہترین انتظامات دی ہدایت کریندیں ہوئیں آکھیا جو تعمیراتی کماں کوں جلدی پورا کیتا ونڄے۔ پورے اسلام آباد خصوصی طور وی آئی پی روٹس اتے ریڈ زون دی پوری صفائی کیتی ونڄے۔ وزیر داخلہ محسن نقوی آکھیا جو ایس سی او سربراہی کانفرنس دے موقع تے اسلام آباد کوں سوھݨا ٻݨایا ویسی۔ کمشنر اسلام آباد محمد علی رندھاوا وفاقی وزیر داخلہ کوں تعمیراتی کماں بارے ݙسیا۔ وفاقی سیکرٹری داخلہ اسلام آباد دے چیف کمشنر تے چیئرمین سی ڈی اے ، ڈپٹی کمشنر اتے متعلقہ حکام وی انہاں دے نال ہن۔
