لاہور۔12ستمبر (اے پی پی):مسلم لیگ ن دے رہنما ، وفاقی وزیرریلوے خواجہ سعد رفیق آکھیے جو پاکستان دے کروڑاں لوک سیلاب توں متاثر تھئن ایں توں ریلوے ٹریک کوں وی ضیان پجے ، مخیر حضرات توں سیلاب زدگان دی امداد دی اپیل کرینداں ، کیا ایں ویلھے سیاسی جھیڑا زیب ݙیندے ۔ سنوار دے ݙینھ احتساب عدالت اچ پیشی دے موقع تے میڈیا نال ڳالھ مہاڑ کریندے ہوئیں خواجہ سعد رفیق آکھیے جو وفاقی حکومت سودھے سارے ادارے سیلاب زدگان دی مدد اچ پیش پیش ہن، سیلاب زدگان دی مدد کرݨ کیتے کہیں کوں نی روکیا ،ہر سیاسی جماعت اپݨا اپݨا کردار ادا کرے، اے ویلھا لڑائی جھیڑے دا کائنی ۔ھک سوال دے ولدے اچ لیگی رہنما آکھیے جو آئی ایم ایف نال معاہدہ تھیوݨ ویندا پئے جݙاں جو سابق وزیر خزانہ شوکت ترین ملک کوں ڈیفالٹ کراوݨ دی غلط حرکت کیتی۔انہاں آکھیے جو ھک لیڈر مسلسل حکومت تے حملے کریندا پئے تاں جو اینکوں کم نہ کرݨ ݙتا ونڄے۔
