اسلام آباد۔13دسمبر(اے پی پی) قومی اسمبلی اجلاس اچ سردار ریاض محمود خان مزاری تے ڈاکٹر محمد افضل ڈھانڈلہ دے جنوبی پنجاب اچ سیلاب توں متاثرہ علاقیں اچ سروے دے دوران حقیقی سیلاب متاثرین کوں شمار نہ کیتے ونڄݨ دے حوالے نال توجہ کراؤ نوٹس دے جواب اچ وفاقی وزیر پارلیمانی امور مرتضی جاوید عباسی آکھیے جو ڈی جی خان، میانوالی اتے راجن پور جنوبی پنجاب دے ترائے ضلعےگزریل سیلاب توں متاثر تھئن ۔ وزیراعظم سیلاب تے مینھ دیاں تباہ کاریاں دے بعد مشترکہ سروے دی منظوری ݙتی جݙاں جو احسن اقبال دی سربراہی اچ ھک ریلیف کوآرڈنیشن کمیٹی وی تشکیل ݙتی ڳئی ۔ ایں مشترکہ سروے دا مینڈیٹ صوبائی ڈیزاسٹر مینجمنٹ اتھارٹیز دا ہئی جݙاں جو صوبائی حکومتاں وی ایندے اچ شامل ہن ۔ این ڈی ایم اے ایندے اچ معاونت کیتی تے ھک لائحہ عمل بݨایا ڳیا جیں دے تحت 12 ستمبر کوں اے سروے شروع تھیا جݙاں جو 15 اکتوبر کوں اے مکمل تھیا۔ 30 نومبر کوں ایں سروے دی رپورٹ صوبیں این ڈی ایم اے کوں بھجواوݨی ہعی تاں جو حالی تئیں نی مل سڳی ، صرف جی بی توں رپورٹ ملی اے ۔ پی ڈی ایم اے دی طرفوں رپورٹ ملݨ تے ایں کوں پبلک کرݙتا ویسی ۔ ریاض مزاری آکھیے منتخب ارکان قومی اسمبلی نال کہیں مشورہ نی کیتا اساں چاہندوں جیں دا ضیان تھئے اونکوں معاوضہ ملݨا چاہیدے۔ ایندے جواب اچ وفاقی وزیر آکھیے ایں مشترکہ سروے اچ پی ڈی ایم اے،صوبائی حکومتاں’ ضلعی انتظامیہ تے ریونیو ڈویژن شامل ہئی جے ایندا ول سروے ارکان چاہندن تاں ایں تے غور تھی سڳدے ۔
