اسلام آباد۔18ستمبر(اے پی پی) وفاقی وزیر اطلاعات مریم اورنگزیب آکھیے جو حکومت دی ساری توجہ سیلاب متاثرین دی بحالی تے لڳی ہوئی اے، عدم استحکام پیدا کرݨ آلے سیاسی یتیم اپݨے منصوبیاں اچ ناکام تھیسن۔ لندن اچ میڈیا نال الیندے انہاں آکھیا جو کہیں دی تڑی یا دھمکی نال انتخابات پہلے یا بعد اچ نہ تھیسن، عام انتخابات مقررہ تاریخ تے ہی تھیسن، اساں سارے کوشش کریندے پئے ہیں جو سیلاب متاثرین دی جتنا تھیوے مدد کریڄے، ایں ویلھے حکومت اتے سارے ادارے سیلاب زدگان دی امداد و بحالی اچ ودھے ہوئن۔ انہاں آکھیا جو موسمیاتی تبدیلیاں دے نتائج غیر متوقع ہین، پاکستان کوں موسمیاتی تبدیلیاں نال غیر معمولی سیلاب دا سامݨا اے، سندھ سیلاب توں ودھ متاثر تھئے، سیلاب متاثرین کوں این اوکھ اچ کلہا نا چھڑیسوں۔ مریم اورنگزیب آکھیا جو سیاسی عدم استحکام او چاہندن جیڑھے آپ سیاسی یتیم تھئے ودن، انہاں کوں سیلاب متاثرین دا کوئی چنتا نئیں، او تاں ٻس ایہو چاہندن جو اقتدار کائنی تاں خدا ناخواستہ ملک کوں ٻھا لا ݙیوو، عوام انہاں کوں ڄآم چکین اتے ٻیا انہاں دے ݙٹ اچ نا آسن۔
